栋笃特工想结伴唱k 【栋笃特工】完首映再去party 波多野大方除衫影相
噚晚波多野結衣嚟到香港,出席《棟篤特工》嘅首映,完咗首映之後,十二點左右波多野就同埋幾個助手出到嚟,一出到嚟佢就除咗件斗篷畀記者影相,咁啱佢出嚟嘅時候現場係戲院散場,都唔少市民現身,當中就有波多野嘅fans,當然清一色係男士啦,佢哋就行過去要求同波多野合照,不過就被助手們拒絕,最後fans只可以喺遠距離影下偶像咁。
過咗一陣之後,波多野就上咗車,去到尖沙咀嘅海港城,出席首映後嘅after party。
《棟篤特工》假九展舉行首映禮,主演嘅黃子華、佘詩曼,以及C君、張繼聰同波多野結衣等眾演員都有份出席,其中子華同阿佘更加係盛裝打扮,坐跑車到場。
大會安排欣宜上台先獻唱主題曲,喺chit chat環節,各演員都幫手介紹套戲,講吓自己演咩角色,其後C君充當司儀,問子華收咗幾多錢片酬,子華答佢:「我係收咗你3倍嘅片酬!」之後眾人大合照,波多野結衣都有埋去一齊影相,但未見佢特別同其他演員交談。
子華、阿佘同C君就一齊做訪問,問到子華今次同C君合作之後,有冇覺得佢可以接班?子華就話:「點止接班,我想佢下次做埋幕後,可以捧番我同阿佘。」C君就搭嘴問係咪要投資埋,子華就話:「你叫Do姐投資啦,佢好有錢㗎!」
講到子華同C君兩個拍戲嘅時候,有冇喺片場互寸,子華就話:「我哋呢啲唔係互寸,係好鍾意大家,好有火花,我好鍾意C君,直頭係盲目嗰隻。」阿佘都話好鍾意C君,仲讚佢人又好、口才又好、又可愛,仲會請佢哋打邊爐。問到阿佘會唔會轉數唔夠快,唔夠子華同C君講,阿佘就話:「其實我轉數都好快,不過你哋唔覺,佢哋對我都好好。」子華又講笑話:「轉數最快係阿佘,C君第二,我就第三,不過阿佘唔表現出嚟。」
子華又話唔敢請朋友嚟睇,因為怕太緊張,但有朋友好好包咗場睇首映,不過都係怕會好緊張,子華話好想喬裝入場睇觀眾嘅反應,至於裝扮方面,佢就話:「都係貼下鬚,如果大家見到有個鬍鬚哨牙,都應該係我。」返回搜狐,查看更多
